من طرف 
طول عمرك شهر خفيف ي رمضان والله
26 يوم عدوا من رمضان ف ثوااااااااااااااااااااااااااااااااااااانى
والله لسه بدرى ي شهر الصيام بحبها اوى الاغنيه دى لما القنوات تفضل تذيعها
كدا ف اخر ايام رمضان واعلانات العيد كلها تظهر
بحس ان رمضان اتخطف بجد
شهر جميل وشهر لذيذ اوى الناس كلها بتبقى متجمعه على حاجه واحده
ساعه الفطار بتجمع الناس كلها غضب عنها حتى لو مش مع بعض ف مكان واحد
بس كله زى بعضه كله ساعه الادان بيفطر غنى فقير كله ساعه الادان واحد
وكله بيقول الحمد لله
وفرحه اول شويه ميه بنشربها ونقول الحمد لله اللهم احفظها نعمه وامنعها من الزوال
قد اى رمضان دا شهر جميل اوى ولياليه هاديه
بغض النظر انه جاى ف الصيف والجو مولع
والناس بتبقى ماشيه كانها متخدره وكله ماشى يتطوح هههه بس والله فعلا
الواحد بيحس معنى العطش وقد اى ف ناس بتبقى مش لاقيه شويه الميه النضيفه
وناس نفسها تذوق شويه العصير اللى انت بتشربها ساعه الفطار
فعلا والله ان ف الصيام دا حكمه كبيره
بجانب فوايده الجسديه الكبيره جدا على قد م بيحسسنا اننا ف نعمه كبيره لازم نشكر ربنا عليها
وان ناس كتير محرومه من حاجات احنا بنعتبرها عاديه ومن كماليات الحياه
على قد م هيا عند ناس كتير من الاساسيات وكمان مش لقياها
الحمد لله الذى اطعمنا وسقانا وجعلنا مسلمين
كله بقى بدأ يستعد للعيد ولبس العيد ي ترى جبتوا ولا لسه ؟
واللى لسه مجبش ميفكرش بقى ينزل دلوقت علشان الدنيا نااااااااااااااااااااااااار
هنا ف المنصوره مشاء الله
انا امبارح تقريبا كرهت نفسى اى نعم مكنتش نازل اشترى بس كنا مشوار مهم
بس والله كرهت نفسى انى نزلت
زحام بطريقه صعبه والناس كلها مستعجله والعربيات كلها فوق بعض
والواحد ماشى عينه ف نص راسه واحد يزنق من هنا ومن هنا
يعنى اللى عاوز بقى ياخدها كعابى كدا
لانك لو معاك عربيه مش هتخلص من الزحمه
ولو بتفكر ف المواصلات يبقى مش هتركب لحد السحور
فالمشى رياضه بقى وكل سنه وانتوا طيببين
وطبعا انا ملاحظ ان دخول البناتيت بقى قليل جدا جدا جدا طبعا حاله النضافه اللى بتنزل على شعب مصر
قبل العيد بكام يوم تلاقى البيوت كلها المراتب والسجاجيد والمخدات وكله نازل ضرب هههههههههههههههه
وانتى ي بت طلعى السجاده دى وانتى ي بت نضفى الحته دى
قال يعنى خلاص طول السنه قاعدين وهما دول بقى حبه النضافه بتوع كل سنه
وتلاقى م شاء الله يوم العيد الساعه 6 الصبح البيوت ولا أكنها بتاع عريس لسه متجوز
نضافه اى بقى وروقان واخر شياكه
والاطباق والكبايات والحاجات اللى مش بتظهر الا على العيد دى
والصنيه بتاع المسليات ــ اللب والفول وما الى اخره ــ والله م بشوفها عندنا الا م العيد للعيد ههههههههههههه
هو اى نعم العيد بقى زيه زى اى يوم
وبالنسبه ليا بقى اكتر من عادى زمان ومش من زمان اوى
كان الواحد له برنامج وافكار ف العيد
واللعب وي عينى حرب المسدسات بغض النظر انك ممكن تخلع عين واحد بس عيد بقى وكل سنه وانت طيب
انما دلوقت ولا له اى معنى بقى عااااااااااااادى
وكمان كا ن يوم العيد دا كان له رهبه جوايا من كام سنه كدا ودا لظروف شخصيه يلا الحمد لله على كل شيئ
بس فعلا مش بقيت بحس بيوم العيد الا ف صلاه العيد الصبح واخواتى بيصحونى ويرخموا عليا الصبح
قوم قوم قوم علشان نصلى
وحلاوه الدنيا وانا صاحى على صوت الله اكبر الله اكبر الله اكبر لا اله الا الله
الله اكبر الله اكبر الله اكبر ولله الحمد
صوت تكبيرات العيد ف المساجد يااااااااااااااااااااااااااه له معنى تانى
وكمان ساعه الصلاه ف المسجد او ف النادى او فى اى مكان واحنا بنردد التكبيرات
وبعد الصلاه والواحد بيفتكر رمضان وي ترى هو اشتغل صح ف رمضان
وربنا رضى علينا ولا لأ
ويترى الصيام هيتقبل ولا لأ
وبعد الصلاه والناس كلها بتسلم على بعضها
احساس جميل
بس ارجع واقول لسه فاضل 4 ايام من رمضان من احلى ايام السنه
مش ننساهم لانهم من العشر الاواخر
واللى مختمش القران زييى كدا ولسه له كتير
يشد حيله ويشجع اللى لسه مش خلص انه يخلص
وادعوا واكثروا من الدعاء
لعل وعسى ربنا يعتق رقبتنا من النار
ولحد اخر ليله ف رمضان اللى ربنا بيعتق فيها الرقاب مثل ما اعتق طول الشهر
ربنا يجعلنا من المقبولين من المغفورين لهم امين يارب العالمين
بس فعلا والله لسه بدرى ي شهر الصيام
