ندى وشادى..حلقات جــــ موت ــــــــامده

وربنا احلى اخوات ف الكوووووون
واحلى رودو زى الفل

يلا تبتدى ف الجديد
دى اخر حاجه نزلتها البنوته اللى حاطه القصه
هستنى بقى لحد م تنزل الجديد عشن اجيبه ليكوا
اصبروا معايا بقى
معلش
64
****************************

نسمة: معلش ياشادي بلاش تيجي دلوقتي هي اخدة منوم اصلا ونايمة.
شادي: يانسمة متكدبيش عليا انا عايز اشوفها.
نسمة: والله العظيم مابكذب عليك, والله ندى نايمة واخده منوم عشان مانامتش طول الليل, بلاش النهاردة كمان يا شادي لحد بس ما اعصابها تهدا.
قال شادي بحزن.
شادي: والله يا نسمة مش انا السبب.
نسمة: انا عارفة طبعا, هو ربنا الي عايز كده, متعدش تفكر بس عشان اعصابك انت كمان, ربنا ان شاء الله يعوضكو بغيره.
شادي: والله انا مش عارف ابطل تفكير, فهميها كده يانسمة الله يخليكي.
نسمة: حاضر ان شاء الله.
شادي: نسمة متسيبيهاش.
نسمة: حاضر.
شادي: مع السلامة.
نسمة: سلام.
بعد ان اغلق الهاتف سمع صوت والدته خلفه.
الام: برضه مش عايزة تكلمك؟.
قال بضيق.
شادي: ماما الله يخليكي اسكتي.
الام: هي بتلومك على ايه انا مش فاهمة, هي الي مهملة ومش واخدة بالها من نفسها والي في بطنها, قاعدة تحرق في دمك على الفاضي والمليان, وفي الاخر بتعيط, ربنا بيعاقبها.
هتف بها شادي فجأة.
شادي: ياماما اسكتي انا مش عايز اتكلم في الموضوع بقى ارحميني, بقالي يومين قاعد عندك وانتي مبتسكتيش, اروح ابات في الشارع عشان ترتاحي, انتي ليه مش حاسة بيا؟,سبيني في حالي بقى.
وقام يدخل غرقته واغلق الباب خلفه في عنف, فقالت هي.
الام: منك لله ياندى يالي قالبة ابني عليا ومزعلاه من يوم ماعرفك.
*************************
ندى: مش عايزة اكل ياماما.
الام: يعني انتي هتفضلي تعيطي كده وبس, حرام عليكي ياحبيبتي نفسك , انتي تعبانة ولازم تاكلي.
ندى: مش قادرة ياماما, مش قادرة اكل ولا اعمل اي حاجة.
الام: ياحبيبتي انتي مش اول واحدة يحصلها كده , طب ما سالي بنت عمك سقطت في اول جوازها برضة ودلوقتي ماشاء الله عندها تامر و حسام.
قالت وهي تبكي.
ندى: انا مش دا الي مزعلني ياماما , انا نزلت ابني بسبب شادي وسلمى, شادي السبب.
الام: يابنتي متقوليش كده, جوزك بيحبك وبيتمنالك الرضا ترضي, والولد من ساعة الي حصل وهو بيجي كل يوم ويتصل وانتي لا بتطلعيله ولا بتردي عليه, حرام عليكي دا ابنه برضه الي راح.
ندى: ماهو راح بسببه, انا خلاص لا عايزة اشوفه ولا اسمع عنه عشان خاطري ياماما بطلي كلام.
الام: يعني هفضل قاعدة اتفرج عليكي كده وانتي بتدبلي قدامي, ياحبيبتي حرام عليكي نفسك.
ندى: متكلمنيش انا, روحي قولي للباشا انه موت ابنه, انا بكرهه.
الام: لا حول ولا قوة الا بالله متقوليش كده.
ندى: انا مش عايزة بقى حد يكلمني خلا ص سيبوني في حالي انتو عايزين مني ايه؟.
الام: انا هسيبك يا بنتي لغاية ماتعقلي, وربنا يهديكي.
*****************
نسمة: ندى.
التفتت ندى الى نسمة .
ندى: ......؟.
نسمة: شادي برة.
ندى: مش عايزة اشوفه.
نسمة: عيب ياندى.
ندى: ملكيش دعوة يا نسمة, والله العظيم ماهخرجله.
نسمة: ........
خرجت نسمة من الغرفة في توتر, وبعد قليل سمعت ندى صوت الباب يفتح فهتفت بعصبية وهي تلتفت.
ندى: نسمة مش قلتلك انا مش هخرج انتي مبتفهميش؟.
سمعت صوت شادي بدلا من نسمة يجيبها.
شادي: انا عارف انك مش عايزة تكلميني, بس انا عايز اكلمك.
قالت بهجوم ما ان رأته.
ندى: شادي!!, انت عايز مني ايه؟, مش ارتحت ؟, مش انا ريحتك.
شادي: انا الي ارتحت؟, انتي الي مكنتيش عايزة الولد دا ومكنتيش فرحانة بيه ولا يوم, وكأن انا جايبهولك غصب ولا انتي نسيتي؟.
اعتدلت في غضب.
ندى: لا دانت مش جاي تكلم بقى, انت جاي تتهمني؟, قصدك ايه بقى؟,ان انا نزلته بمزاجي يعني؟, كنت قاصدة؟.
شادي: انا مش قصدي كده ياندى, بس انا قصدي ان انتي عصبيتك وغبائك دا هو السبب في كل الي بيحصلنا دا.
ندى: يا سلام, كمان طلعتني انا الي غلطانة وانت ملاك.
رد بغضب.
شادي: مانا مش هعرف اتكلم معاكي كده وانتي بتقلبي كل كلمة بقولها.
ندى: وانا مطلبتش اتكلم معاك اصلا.
شادي: ندى انا بحذرك الي بتعمليه دا غلط, و انا مش هستحملك كتير.
ندى: وهو انت عمرك كنت استحملتني؟.
صمت قبل ان يقول بتحذير.
شادي: بقى هو دا رأيك ياندى, دا بدل مانقف جمب بعض في الي حصلنا قاعدة بتخانقيني.
ندى: بطل بقى تمثيل وكدب,. خلاص انا عرفت انك كداب وبتخبي, فاصلني عن حياتك وعن كل حاجة, مش عايزني فيها اديني ياسيدي بطلع منها اهه وبريحك.
هتف بها.
شادي: بتطلعي منها ازاي ياندى انتي فاهمة اصلا الي بتقوليه.
ندى: لا انا فاهمة كويس , وانا مش عايزة اعيش معاك تاني, مش بعد مافضلت عليا سلمى, وضيعت ابننا بعندك وخيانتك.
شادي: الكلام الي بتقوليه دا كبير اوي ياندى, وانا مش هرد على واحدة مجنونة زيك, ولغاية ماتفوقي من جنانك دا وتفوقي لنفسك مش هتسمعي صوتي ولا تشوفي وشي عشان انا مش عايز اغلط فيكي.
ندى: احسن, سهلت عليا.
فخرج من غرفتها غاضبا والشرر يكاد يتطاير منه.
*********************
هايدي: والله يانسمة اول ماعرفت جيت على طول.
نسمة: عادي ياهايدي, هي دلوقتي بقت احسن, بس نفسيا زي الزفت.
هايدي: ربنا يصبرها اكيد الموضوع مش سهل.
نسمة: لا هو سهل وعادي وبيحصل, بس هي دلوقتي مش عايزة ترجع البيت, اصلها منزلتوش عادي, دي نزلته عشان زعلت مع شادي.
هايدي: سبحان الله يعني الاتنين الي كل الناس كانت بتحسدهم على حبهم لبعض قبل وبعد الجواز يبقى دا حالهم ياربي, دول الناس الوحيدة الي حبو بعض واتجوزو, الدنيا دي غريبة اوي.
نسمة: بقى انتي برضة الي بتقولي غريبة, و الي يشوفك يقول ايه, بقى دي هايدي الي اتربيت معاها؟.
هايدي: عيب عليكي يا نسمة وهو انتي اتربيتي اصلا.
نسمة: اه يا واطية.
هايدي: هههههههه والله يانسمة بجد انا نفسي مستغربة ازاي كنت عايشة كده, الحمد لله , انا مفتكرش اني كنت بدعي ربنا زمان تخيلي, كان كل الي بدعيه يارب متفضحنيش المرة دي, يارب حمادة يكلمني, يارب اتخطب لواحد غني عشان اغيظ لؤي, ربنا ياخد امه,انتي متخيلة انا مكسوفة اد ايه من الي كنت بدعيه.
نسمة: هههههه يا بنتي انسي بقى انتي هايدي جديدة.
هايدي: قولي كده للناس, انتي عارفة يا نسمةانا بسمع كلام وتريأة من الناس ومن اصحابي في الشغل قد ايه, فاكرينه دور كده وهطلع منه قريب, انا بفكر اسيب الشغل.
نسمة: بصي يا ديدي, لو مكنتيش هتقدري تثبتي سيبي الشغل, لكن لو فترة وهتعدي استحمليها, اي مرحلة انتقالية بتبقى صعبة , انا افتكر هالة برضة ايام ما اتهدت كانت قاعدة في البيت الفترة دي عشان الحادثة فكان الموضوع اسهل علها, انتي يابنتي ربنا يعينك.
هايدي: هي ندى جوة؟, انا ممكن ادخل اسلم عليها ولا لأ؟.
نسمة: لا يابنتي ممكن طبعا تعالي اهو حتى تفكي عنها شوية, هي ليل نهار قاعدة تعيط.
*********************
شادي: مش عايزة تكلمني خالص ياسلمى, وانا كمان مش عايز اكلمها, اصلها غبية.
سلمى: بس ياشادي متقولش عليها كده, الي حصلها مش سهل.
شادي: لا ندى بتستهبل وانا عارفها, يعني هو الي حصلها دا كان ليها لوحدها, هي كده طول ماهي حاطة في دماغها حاجة مش هتشيلها, بس تتفلق, انا كنت صابر عليها ومستحملها بس عشان الي في بطنها, بس الي بتعمله دا دلوقتي استهبال, انا الي غلطان انا الي دلعتها واول ما بتتدلع بتتدلع عليا انا, ماما عندها حق من الاول.
سلمى: انتو بس تعبانين من الي حصل, ان شاء الله تعدي على خير, انتو بس بتزعلو من بعض من كتر حبكو لبعض.
قال بسخرية.
شادي: اه اوي, حب وزفت, يا شيخة يقطع الحب وسنينه, دي كانت حاجة زفت.
سلمى: لااا انت مزاجك وحش خالص.
شادي: انتي الي هادية كده وسرحانة, مالك؟.
سلمى: مفيش.
شادي: سلمى انا مش ناقصك, قوليلي مالك متعصبنيش.
نظرت للارض لحظات قبل ان تقول بهدوء.
سلمى: انا امبارح نزلت انا وماما نشوف احمد قريب وليد, واتفقنا انه يجي يتقدم في البيت.
نظر اليها شادي غير مصدق لثوان.
شادي: ازاي كده يجي البيت بسرعة, انتي تعرفيه؟, انتي لسه متعرفيهوش يا سلمى , طب استني شوية , مفيش حاجة بتيجي بسرعة كده.
سلمى: مش بسرعة ولا حاجة, انا شفته مرتين قبل كده , وبعدين....استنى ايه يا شادي؟.
صمت ولم يدر ما يقول , ثم قال بحيرة.
شادي: ....استني.
سلمى: ..........
شادي:.............
سلمى: معادش ينفع استنى ياشادي, احمد انسان كويس وميتعيبش.
شادي: وانا مقلتلكيش حاجة , انا بقول استني تعرفيه.
سلمى: مش فارقة ياشادي, معادتش فارقة, هو زي غيره, وممكن يكون احسن من غيره, يارب.
شادي: ....انتي متأكدة؟؟.
سلمى: الحمد لله.
شادي: خلاص يا سلمى ربنا يوفقك , انا عمري ماتخيلت .......اناعمري ماهتمنالك.....حد....الا كل خير يا سلمي...انتي اكيد حد كويس.
سلمى: ييييييييه ياشادي بطل حد كويس دي بقى, الكويس مش حاجة حلوة, الكويس دايما بيفضل كويس وبس, مينفعش يبقى ممتاز او مناسب, لما بتقولي كويسة انا مبفرحش, معنى كويس اني منفعش.
شادي: وانا عمري ماقصدت ازعلك, ربنا يوفقك ياسلمى ربنا الي عالم معزتك في قلبي.
تنهدت سلمى.
سلمى: ربنا الي عالم بالي في القلوب يا شادي بقى, خلي الي في القلوب في القلوب

سورى ي شباب
القصه ف الموقع اللى بنقل منه وقفت لحد كدا

هكمل معاكوا اول م تيجى

اخيرا وبعد طول انتظااااار هتكمل القصه

يلا ندووووووووووووس
67 و 68
****************************
اية: ايه ياعم دا بس كل يومين هنا.
ضربت اية علي على كتفه بخفة وهي تعترض طريقه, فالتفت اليها قائلا.
علي: يويووووو,والله يا بنتي عندي شغل هنا.
اية: طب ما تنقل هنا وتريح نفسك.
علي: لا, انا مبحبش اعد في مكان واحد كتير, انتي عارفاني , حر وبحب اطير كل شوية عشان مزهقش.
اية: طب يا سيدي يارب ماتزهق مننا.
علي: وانا من امتى زهقت منكو, دانتو قدري ههههه.
ضكت قبل ان تقول بشيء من المكر.
اية: وايه حكايتك بقى انت وندى؟.
علي: حكاية ايه؟.
اية: على ماما.
علي: والله مافيه حاجة يا بنتي مالك؟.
اية: انت هتمثل يا مصري, انت عايز تقنعني ان انت مش حاسس بحاجة نحية ندى.
قال بدهشة حقيقة.
علي: ايه الي خلاكي تقولي كده....لااااا الموضوع دا عايز قعدة تعالي تعالي نعد في حتة.
وبعد ان استقر بهما المقام في كافيتيريا الشركة قال بجدية.
علي: ايه يا بنتي الكلام الغريب الي بتقوليه دا, ندى واحدة متجوزة مينفعش يكون بينات حاجة.
اية: لا ندى مش متجوزة وانت عارف, ندى الموست متطلقة, يعني فاضية.
علي: انتي هتفولي عليها يا اية.
اية: انت هتستهبل يا مصري, مانت عارف, انت مش بتكلمها كل يوم يا بني, خلاص ندى وشادي معادش ينفع يرجعو لبعض.
نظر اليها باندهاش قبل ان يقول وكأنه ينفي عن نفسه شيئا مشينا.
علي: يا اية انا مستغرب انتي ازاي تفكري ان انا وندى ممكن يكون بينا حاجة, ندى بتحب شادي, حتى لو سابته هي لسه بتحبه, مش انا الراجل الي يقبل على نفسه كده.
اية: ولوقلتلك انها مبتحبوش.
قال بشيء من الحدة.
شادي: دا كلام مش انتي الي تقوليه وحتى هي لو قالته انا مش هصدقها, صحيح هي في مشاكل دلوقتي وهو طلع واطي, بس هي لسه بتحبه وهيفضل اول حد في حياتها.
اية: بس.....
قاطعها.
علي: انا لو كنت اقبل زمان ان انا اخد واحدة كانت مرتبطة قبلي بحد وبتحبه, كان ممكن اتعايش مع علاقتها وحبها لشادي الاول, بس دلوقتي مقبلش انها تكون اتجوزته وبعد مافركشت دورت في دفاترها القديمة, قالت اه علي المصري, اهو واحد كان بيحبني, اما اخده سبير لو منفعش شادي نتعكز على المصري, انا مقبلش ولا انتي تقبليلي حاجة زي كده, ولا ندى نفسها تقبلي.
شعرت اية بالحرج قليلا من لهجته اللائمة.
اية: امال انت بتكلمها ليه على طول, وقريب منها.
علي: انا بعمل واجبي نحية ندى كصديق زي ما كنت طول عمري بالنسبة لها صديق, ومش بعد ماخرجتني من حياتها هي بارادتها, عايزة ترجعني وقت ماهي عايزة, لا طبعا, انا مش شخشيخة يا اية, انتي نرفزتيني على فكرة.
قالت ايه بتردد.
اية: بس انا كنت فاهمة غير كده.
علي: لا افهمي الحقيقة , اكيد ندى فاهمة صح, وانتي حبيتي تتصرفي من دماغك, متعمليش كده تاني عشان متضيعيش الدنيا, اوكي يا قلة.
اية: على فكرة ندى مقالتليش حاجة زي كدا انا الي قلت والله كان نفسي تتلمو زي زمان, بس مكنتش عارفة انك معارض بالشكل دا, خلاص يا سيدي لو مكنتش عايز ندى, مش مشكلة, بس اوعى في يوم تضحك عليها.
علي: انتي عارفة اني مش ممكن اعمل فيها كده, ندى زي اختي, حتى لو انا في فترة من حياتي كنت متعلق بيها, انا مش عارف انتي ازاي فكرتي كده, مجنونة انتي؟؟.
***************************************************
قامت ندى وهي تمسح دموعها في اكبار.
ندى: انتي بتتصرفي من دماغك يا اية؟, ازاي تعملي كده.
اية: انا كنت خايفة عليكي, كنت عايزة اعرف مشاعره قبل مانتي تتدلقي.
قامت ندى وهي توليها ظهرها تقول بانكسار.
ندى: ومين قال ان انا هتدلق, انا مفيش حاجة في قلبي ناحية المصري, انا كنت بفضفض معاكي بس مش اكتر, انا كنت عارفة اكيد انه مش هيرضى بواحدة متطلقة, وهو مين يرضى بوضع زي دا اصلا, انا كنت بس بستريح لما بكلمة, ودلوقتي افتكر ان معادش ممكن اتكلم معاه تاني, انا خسرت المصري دا كذا مرة, بس المرة دي بجد انا خسرته للابد.
اية: متقوليش كده.
ندى: هي خلاص كده.
اية: .....انتي زعلتي؟.
ندى: اكيد.
اية: بس هو مأنكرش انه كان بيحبك.
ندى: انكر ولا مأنكرش, دا اوحش كمان من انه ميكونش بيحبني, يعني انا وضعي مش محتمل حتى لواحد كان بيحبني, بس يا ايه, بس الله يخليكي.
وبدأ الاكتئاب يظهر على وجهها.
اية: انا اسفة ياندى بجد كان نفسي اساعدك.
ندى: انا كل الي بيحاول يساعدني يبوظلي حاجة, الله يخليكو بطلو تحاولو تساعدوني.
******************************************
قالت نسمة وهي تحاول الوصول الى احد اطراف فستان الزفاف الذي تقيسه.
نسمة: ايه دا, البتاع دا عامل من هنا كده ليه, مش مريحني.
اعدلتها هالة بحدة وهي تقول.
هالة: يابنتي بطلي حركة بقى, اثبتي عشان نعرف نعدل الزفت عليكي, ندى ايه رأيك....ندى.
افاقت ندى من شرودها وقالت.
ندى: هه؟.
نسمة: ياندى فوقي معايا بقى الله يخليكي.
ندى: ماله يا نسمة؟, جميل اهه.
نسمة: انتي يا بنتي متنحة ليه من يومين مالك, ايه حصل جديد؟.
قامت ندى تقول بعصبية.
ندى: محصلش حاجة, اقلعي اقلعي بس الفستان الي انتي لابساه.
واندفعت تخرج من الاتيلية وسط دهشة احتيها, واثناء طريق العودة, نظرت هالة الى ندى الشاردة في صمت بمقعد السيارة الخلفي ثم التفتت اليها تقول.
هالة: مالك ياندى, انتي مبقتيش بتكلمي المصري؟.
ردت باقتضاب.
ندى: لا.
هالة: ايه الي حصل؟.
ندى: مفيش.
نسمة: انتي اتعلقتي بيه ياندى؟.
ندى: لا.
هالة: احسن برضة انكو بطلتو تتكلمو, الوضع دا مكانش مريح اصلا.
قالت ندى ببعض الحدة.
ندى: مريح ولا مش مريح, احنا مش بنتكلم ولا هنتكلم.
هالة: طب انتي زعلانة ليه؟.
صمتت لحظات فعادت هالة تنظر امامها,فقالت ندى .
ندى: انا بفكر ارجع لشادي.
شهقت نسمة, بينما عادت هالة تلتفت اليها وهي تقول.
هالة: بتكلمي بجد يا ندى؟.
اصمتهن صوت ابواق السيارات خلف سيارتهن اثر حركة نسمة العنيفة لدى سماعها الخبر, وانتظرن حتى هدأ الصوت, لتقول نسمة بهتاف.
نسمة: ترجعيله ازاي؟.
ندى: ارجعله زي ماكنتو عايزين في الاول.
هالة: بس دا في الاول, دلوقتي مينفعش, انتي مش عارفة الوضع بقى ايه؟.
ندى: هعمل ايه يعني؟.
هالة: انتي جاية دلوقتي تسألي هتعملي ايه؟, انتو مش خلاص مصممين على الطلاق, وبابا وماما لو شافو اهله في الشارع هيضربو بعض بالنار.
قالت ندى في مرارة والبكاء يتسلل الى صوتها.
ندى: يعني هعمل ايه يعني؟, هتطلق, وبعدين, هبقى متطلقة, مش هلاقي حد يرضى بيا ولا يعوزني, وحتى لو لقيت, انا هقدر احب تاني؟, ولا اعرف حد تاني, ولا افتح قلبي لحد؟, لسه هقدر, دانا كل عمري قضيته مع شادي, عمري ماحبيت حد تاني, مش فاكرة حتى انا كنت عاملة ازاي قبل ما اعرفه, مش هقدر اخلي حد تاني يدخل حياتي, انا مش بحبه لا, بس انا معرفش الا هو, ومش هقدر اعرف غيره خلاص, مفيش لا وقت ولا بقى فيا روح اعرف من جديد, دا غير ان خلاص, حالتي دلوقتي...يعني لما اتطلق,...هلاقي واحد يبصلي؟؟,...يعني علي,..اللي كان بيموت فيا....مرضيش بيا, اي حد مش هيرضى خلاص, هيقول وانا مالي, انا مفيش عندي حل تاني انتو مش فاهمين.
قالت نسمة بحدة.
نسمة: هو ايه دا الي بتقوليه, دا رزق ونصيب, انتي بتتكلمي في حاجات غلط جدا على فكرة.
لمستها هالة بطرف يدها لتصمت, وعادت تقول بهدوء لندى.
هالة: انتي فاهمة ياندى لو رجعتي ايه الي هيحصل.
قالت ندى ببكاء.
ندى: عارفة.
هالة: عارفة انك هتتنازلي عن كرامتك وعن حقوقك وعن كل الي ماما وبابا عملوه علشانك؟.
قالت ببكاء اكبر.
ندى: عارفة.
هالة: وهتبقي تحت امره بعد كده في اي حاجة, لانك رضيتي تتهاني وسكتي.
ندى: بس شادي مش هيعمل فيا كده.
هالة: اشعرفك, مانتي قلتي انه عمره ماهيعمل الي بيعمله فيكي دلوقتي دا.
ندى: ياهالة متحاوليش, حالة احسن من حالة, مهما كانت ذل وقرف احسن مارجع بيتنا واعد عالة عليهم, على الاقل انا في بيتي.
صمتت هالة وشعرت بالاشفاق على اختها, ثم عادت لتقول.
هالة: انا مش عارفة اقلك تختاري ايه, انتي في اختيارين اسوأ من بعض, ما بين انك ترمي كرامتك في الارض, وتروحي تعتذري لشادي ولمامته وترجعي, عارفة وعارفين انك مالكيش حقوق وقت ما يحب يرميكي براحته, لا عنده ليكي شبكة ولا مؤخر ولا حقوق مادية, وكرامتك مالهاش اي اعتبار عندهم, وحتى اهلك ماشافوش منهم احترام, ومابين ان ترجعي بيت اهلك متطلقة وتعدي زي مابتقولي مش قادرة ولا عايزة تعرفي حد جديد, الاتنين نار يا ندى, انا لو مكانك مش عارفة كنت هختار ايه, بجد الله يكون في عونك.

********************
دخلت والدة ندى غرفتها بسرعة,وضعت العصير على المكتب في صمت وانصرفت في اقتضاب.
اية: هو فيه ايه؟, طنط مالها؟.
قالت ندى بأسى.
ندى: مبتكلمنيش, محدش في البيت بيكلمني الا نسمة.
اية: ليه كده؟.
ندى: عشان عايزة ارجع لشادي.
اية: انتي بتتكلمي بجد ياندى؟, انا كل دا فاكراها حالة وهتعدي, شادي ايه الي ترجعيله دا؟.
ردت ندى بنفاذ صبر.
ندى: هعمل ايه يعني؟,اصل انتو بتستعبطو, قاعدين تتكلمو من برة وبس, محدش حاسس بالي انا فيه, حاطين ايديكو في مية باردة.
اية: طب هي مامتك عملت ايه لما قلتيلها؟.
ندى: دول كانو هيقتلوني يا ايه؟.
اية: عندهم حق, ماهو مش بعد الي عملتوه والي مامته عملته, وقلة الاصل الي حصلت.
وضعت ندى يدها على عينيها.
ندى: انا مخنوقة جدا يا اية ومحدش فيهم حاسس بيا, يعني الي انا عملته عشان اوصل للقرار دا صعب اصلا, وهما كل الي بيعملوه بيصعبوه عليا زيادة, بقيت مش عارفه احارب فين ولا فين.
اية: بس... انتي مش بتجازفي كده؟.
نفثت في ضيق وهم شديد قبل ان تقول.
ندى: طبعا بجازف, بجازف بكل حاجة, بجازف بمستقبلي كله, بس مفيش في ايدي حل تاني.
اية: وباباكي قالك ايه؟.
ندى: بقولك مبيكلمونيش خلاص, قالولي لما تعقلي نبقى نكلمك.
اية: وانتي قلتي لشادي؟.
ندى: بعتله مسدج امبارح, قالي لما ابقى ارجع من الشغل بكرة وابقى فايق اكلمك.
اية: ودا ايه قلة الذوق بتاعته دي!!.
ندى: اصل انا بعتاهاله الساعة 3 ونص الفجر.
اية: والله انتي مجنونة, اهو بدأ شغل الاستهبال بتاعه وبدأ يتقل عليكي.
ندى: ايه الله يخليكي ...انا مش ناقصة, يتقل ولا يتهبب يعني كان خف عليا امتى اصلا.
*******************************
ندى: ايوة ياشادي.
قالت ندى لك بحزن.
شادي: ايوة ياندى, ايه المسدج دي؟.
ندى: ايه الي ايه ياشادي؟, خلاص الي انت عايزه, عايزني ارجع البيت هرجع, ولا انت مش عايز خلاص؟.
صمت للحظات قبل ان يقول.
شادي: ايه الي غير رأيك؟.
ندى: انا رأيي زي ماهو ماتغيرش.
شادي: لا ياندى انتي مكنتيش عايزة ترجعي.
ندى: شكلك انت الي مبقتش عايز.
شادي: وافقتي يعني بجد تيجي تعتذري لماما؟.
شعرت ندى بقلبها ينقبض في حزن.
ندى: ............ الي تشوفه.
شادي: ياندى,.....اوووف.....طب واهلك قلتيلهم؟.
ندى: ايوة قلتلهم.
شادي: ومش موافقين طبعا.
ندى: انت قلت لمامتك؟.
قال بشيء من الحدة.
شادي: مش لما اتأكد من الجنان بتاعك الاول, لحسن تغيري رأيك زي كل مرة, مانتي مجنونة وملكيش كلمة.
جاهدت ندى نفسها لتقول والدموع تنفر من عينيها.
ندى: ........ معلش.
شادي: يعني مامتك هتكلم ماما ولا ايه بالظبط.
قالت في سرعة.
ندى: لا......ماما مش هتكلم حد, .....انا بس ...ماما مش هتتكلم...بس انا ممكن اكلمها لو عايز دلوقتي, ولا تحب اجيلكو البيت.
قال شادي بشك.
شادي: ندى, ممكن اعرف ايه الي حصل بالظبط خلاكي ترجعي في كلامك.
بدأت ندى بالبكاء وهي تقول.
ندى: شادي, خلاص ياشادي, انا عايزة ارجع بيتي, انت مش عايزني, قول انا مش هفرض نفسي عليك, انا قلتلك مستعدة اني اجي واعتذر لمامتك , انت عايز ايه تاني, انت مصمم تحرجني وتيجي عليا وعلى كرامتي.
صمت ازاء بكائها , قبل ان يقول بهدوء.
شادي: ماشي ياندى, كلمي ماما , واتفقي على معاد تيجي تصالحيها فيه, ماشي!!.
حاولت ندى استشفاف اي مشاعر في صوته, فلم تستطع فقالت بأسى.
ندى: .....انت مش متضايق ولا فرحان ولا حاجة, هو انا مكنتش فارقة معاك للدرجة دي؟.
شادي: .....لا كنتي فارقة, بس انا كنت فاكر ان خلاص انا مش في دماغك.
ندى: .........خلاص ياشادي الكلام معادش بيجيب همه.
شادي: على رأيك.
ندى: يلا ياشادي, لما تبقى في البيت ابقى كلمني عشان اكلم طنط.
شادي: ان شاء الله.
ندى: سلام.
شادي: سلام.
******************************************
الام: بصي ياندى, انتي حرة طبعا في حياتك واختياراتك, بس انا بقلك ان الي بتعمليه دا غلط, وانا ماليش دعوة بيك من الالف الى الياء انتي فاهمة, ومش راضية عن رجوعك لشادي قليل الاصل دا.
جلست ندى امام امها وهي تبكي.
ندى: يعني هعمل ايه بس ياماما , انتي يرضيكي ابقى متطلقة؟.
الام: ولا يرضيني ترجعيله وتذلي نفسك الي عمرك ماذلتيها لحد ,وتقلليني انا وابوكي بعد ماكبرناكي.
ندى: انا تعبانة ياماما, تعبانة ومحدش حاسس بيا, انتي فاكرة اني فرحانة اني ارجعله, بس قضا اخف من قضا ياماما.
الام: انا مش موافقة ياندى انا مش موافقة, وماليش دعوة, ارجعيله بس يكون في علمك, انا مش هدخل لاهله بيت ولا هعتبه ابدا, وامه دي يارب ابعدني عنها, لا هحاول احتك بيها لا في سبوع ولا في فرح ولا في اي مناسبة, عشان انا الست دي جابت اخرها معايا خلاص, وانتي منك ليهم بقى.
ندى: يعني هتسيبوني.
الام: انتي خلاص حرقتي الورقة بتاعتنا خلاص, ولقو ان عضمك طري وان هما الي متحكمين,
فانتي بالنسبة ليهم بقيتي حاجة ملهاش قيمة...متعيطيش, انا مش هضحك عليكي, وعشان احنا اهلك احنا مضطرين نستحمل شادي دا لانك عايزاه, بس اهله احنا مش مضطرين نستحملهم, انا بدعيلك والله يا بنتي اوعي تقولي ابدا ان انا عايزة اخرب عليكي, اوعي, انا بس كان نفسي احفظلك حقك من البداية من اول مادخل البيت دا وانتي بدأتي تتنازلي في حاجة ورا حاجة, وبدأتي تعملي حاجات من ورايا ماعرفناهاش الا دلوقتي, زي حكاية الفرح والشبكة الي بعتيها عشان تجيبيله عربية, انا كنت عايزة اقطم رقبتك عشان الي عملتيه, بس انا مش محتاجة اعمل حاجة خلاص, انتي كفاية الي انتي فيه, على العموم يا ندى, انا معاكي يابنتي , وشادي على عيني وعلى راسي على الاقل لو غلط اهو لسه صغير, العيب بقى على غلطات الكبار الي بيعمل حاجات مش صح.
ندى: انا اسفة ياماما , انا اسفة اني تعبتكو معايا وقليت قيمتكو, انا هصلح كل غلطاتي خلاص انا اسفة بجد, مش عارفة اعمل ايه عشان اريح كل الناس.
الام: متعمليش, خلاص ياندى الي حصل حصل خلاص, ومعادش فيه حاجة تتعمل, انا عايزاكي بس تروحي لباباكي وتبوسي راسه وتعتذريله, وتفهميه بالراحة ان انتي عملتي كده عشان انتي عايزة تلمي بيتك, وتعقلي كده وتبطلي تيجيلنا كل يومين, عشان يرضى عنك.
ازداد بكاء ندى.
ندى: انا خلاص مبقتش حاسة بفرحة في اي حاجة خلاص, انا مش عارفة اناعملت ايه لكل دا.
****************************************
الام: هتيجي تعتذرلي؟؟؟.
قالت والدة شادي ذلك بدهشة.
شادي: ايوة يا ماما.
الام: واهلها؟.
شادي: الله ياماما انتي مش قلتي هي تيجي تعتذر؟.
الام: ماشي, بس انت عايز ترجعلها؟.
شادي: ايوة ياماما انا مش عايز اطلق وانا لسه صغير كده.
الام: والله يابني قلتلك الطلاق مبيعيبش راجل, ومراتك دي خميرة عكننة والله.
شادي: خلاص ياماما بقى.
الام: دي رجعت بس عشان لقت انها مش هتكسب حاجة.
شادي: ماما خلاص خلصنا, الي انتي عايزاه وهنعملهولك, متعديش تكرهيني في حياتي بقى.
الام: وانا مالي ياخويا هو انا قلتلك حاجة, انت حر انا مالي بيك وبحياتك, عشان متعدش تقول اني بتدخل.
نظر اليها شادي محتقن الوجة للحظة, ثم تركها وانصرف الى غرفته وهو يتمتم.
شادي: يارب صبرني على امي ومراتي يارب, صبرني.
******************************************
نظرت نسمة الى ندى التي ترتدي ملابسها ببطء, وقالت بإشفاق.
نسمة: خايفة؟.
اشارت ندى برأسها نفيا في صمت.
ندى: تعبانة مش خايفة, كأني رايحة وهم كبير على قلبي , وحاسة ان خنقة الدنيا فيا.
نسمة: اقلك ومتزعليش؟.
ندى: ....قولي , انا اصلا زعلانة مفيش حاجة ممكن هتزود همي, قولي الي عندك.
نسمة: الي بيحصلكو دا ذنب انكو كنتو بتغضبو ربنا قبل ماتتجوزو.
ندى: نغضب ربنا ايه يا نسمة انتي كمان, احنا كنا بنتقابل في حتة غلط مثلا, بلاش كلامك الي يضايق دا.
نسمة: والله يا ندى انا بتكلم جد, انا قلتلك قبل كده ومصدقتنيش, قلتلك ان ربنا بيشيل البركة من الحاجة الي قبل وقتها لما بتيجي بعدين مصدقتيش, وانتو ماشاء الله ماكانش فيه حاجة سبتوها, خروج وفسح وسفر ومسك ايدين وصور وكل حاجةكنتو فاكرينها حاجات صغيرة, كل حاجة عملتوها قبل ما تتخطبو حتى, وكلام حب, كنتو على راحتكو خالص, بعد الخطوبة اعوذ بالله كأن غضب ربنا نزل عليكو, مكنتوش بتشوفو يوم حلو, ومن يوم ماتجوزتو مش مرتاحين, هتقوليلي ميت سبب, بس انا متأكده ان هو دا السبب يا ندى, والله لو دورتي هتلاقي مفيش سبب اقوى من كده.
ندى: يانسمة احنا نصيبنا كده.
نسمة: متبرريش لنفسك, مش هو دا الي حصل وانتي عارفة, انتي لو مكنتيش متأكده ان شادي زهقان منك, مكنتيش شكيتي فيه ابدا ان ممكن يبص لسلمى.
ندى: مش سلمى يانسمة السبب, مطلعتش سلمى خالص.
نسمة: فاكرة يا ندى لما قلتلك متضحيش عشان شادي, ومتتهاونيش في حقك هو لازم يتعب فيكي قلتيلي دي شوية فلوس , وانا مفيش بيني وبينه كده , والي ربى خير من الي اشترى, وانا قلتلك لا الى اشترى احسن.
ابتسمت ندى ابتسامة حزينة, فأكملت نسمة.
نسمة: عرفتي بقى ليه الي اشترى احسن, عشان الي اشترى دفع فلوس, ولو مزعلش على البنت هيزعل على الفلوس الي دفعها, بس دا لا ربى ولا اشترى, دا كان داخل وضع يد, وانتي سبتيه, امال انتي فاكرة ليه ان ربنا كاتبلنا حقوق وفلوس , عشان الي بياخد بالرخيص بيرمي بالرخيص ياندى.
رفعت ندى وجها حزينا لاختها وقالت.
ندى: نسمة, انا دلوقتي بشيل ذنوبي وذنوب شادي, لان هو نفسه مش فارقة معاه, انا بس الي مذلولة انا بس الي راجعة عشان سمعتي, هو مش هتفرق معاه حاجة, هو ولد على رأيكو مش هيخسر اي حاجة, ممكن يعيش من اول وجديد ولا كأن حاجة حصلت, كل الكلام الي بتقوليه دا, بيوجعني زيادة, وبيخليني اكرة اني ارجع, عشان هو نفسه كان المفروض يراعي ربنا فيا لو كان بيحبني بجد, وهو مراعاش ربنا فيا قبل الجواز, ازاي اتوقع منه انه يعمل كده بعده.
نسمة: اديكي قلتي بنفسك, انا مقتلتش حاجة اهه.
ندى: اعمل ايه انا بقى, خلاص الي حصل حصل.
نسمة: لا ارجعي بنية تانية ياندى, ارجعيله بنية ان انتي عايزة فعلا تلمي بيتك مش عشان متطلقيِش وحاولي تسايسي مامته, وترضي بابا وماما, متبقيش غبية زي ماكنتي, واذا ماكانش الي حصل دا هو الي هيعلمك ياندى يبقى مفيش حاجة هتعلمك.
ندى: ربنا يستر يانسمة, ربنا يستر من شادي انا مبقتش اقدر اامنه في حاجة تاني خلاص.