وظائف خاليه للشباب للعمل كفئران تجارب في شركات الادويه !! تص

[ندعوك للتسجيل في المنتدى أو التعريف بنفسك لمعاينة هذه الصورة]

السلام عليكم ورحمة الله وبركاته

شاهدت منذ فتره ليست بالطويله برنامج العاشره مساء على قناة دريم الفضائيه

وبدأت المذيعه منى الشاذلي تعرض ايه هو محتوى الحلقه النهارده


وقالت ان هيكون معانا انهارده عمرو عبد ربه

وهو شاب بالفرقه التانيه كلية التجاره جامعة القاهره

وهيحكي عن الاعلان الوظيفي اللي كان متعلق في الجامعه

(واستنيت بفارغ الصبر انه ييجي وجه البطل عمرو عبد ربه)

وبدأ عمرو يحكي اللي حصل بالظبط
فقال

_والله كان في اعلانات في الجامعه متعلقه بتعلن عن وظايف خاليه

للذكور وبمرتبات مجزيه وكاتبين رقمين تليفون

اتصلت وقولت اشوف ايه هو الشغل ده اللي بيعلنو عنه جوه الجامعه

وادوني ميعاد علشان اروح املى الابلكيشن و سألت اللي رد عليا عن طبيعة العمل

قالي اما تيجي هتعرف..

روحت في الميعاد وقابلني راجل هناك

بدأ يقولي ايه هي طبيعة العمل

احنا شركة ابحاث دوائيه وانت هتشتغل هنا معانا

علشان نجرب الادويه عليك وهيكون ليك مرتب ثابت

750 جنيه شهريا بالاضافه لـ ان كل عينة دم هناخدها منك

هيكون ليك 50 جنيه عليها وكل ما تعرف تجيب حد يشتغل معانا

زيك يعني هيكون ليك عموله 250 جنيه

وفي كشف طبي قبل ما تبتدي الشغل لازم تعديه علشان نعرف لو كنت تصلح او لا

وده برده بتاخد عليه 250 جنيه

وتقريبا هناخد اثناء الكشف الطبي ده 3 عينات دم وحقك فيهم محفوظ!

ولازم تمضي لنا على اقرار ان كل اللي بيحصل ده بمحض ارادتك وانك موافق عليه

المذيعه : وكان احساسك ايه يا عمرو لما عرفت ان الموضوع كده

عمرو : والله حضرتك اول ما قالي احنا شركة ابحاث دوائيه

انا قريت السيناريو كله وعرفت هو هيقولي ايه

المذيعه : يعني ايه

عمرو : يعني معروف ايه هو باقي كلامه وايه هيكون المطلوب مني ..

المذيعه( في ذهول تام ) : ايه ده يعني الحكاية دي منتشره ومعروفه

عمرو (في ابتسامة خجل) : اه منتشره ..

وكمل عمرو كلامه وقال انه

رد على الراجل وقاله انه هيفكر ويرد عليه .. مقلوش انه رافض

وقاله بس معلش انا بنسى الاسماء دايما لو سمحت هات الكارت بتاعك

وخد عمرو الكارت منه ونزل على قسم مصر الجديده على طول وبلغ عنه

المذيعه : طيب ليه بلغت يا عمرو ؟

عمرو : لأنه وراني انه ماضي على الاقرار ده اكتر من 100 واحد

انا بلغت علشان الميه دول مش اكتر
(ربنا يحميك يا عمرو)

المذيعه : طب وكان رد فعل اصحابك في الجامعه ايه يا عمرو

يعني لما عرفو قالولك ايه ؟ عايزه اعرف الجانب السلبي

والجانب الايجابي..

عمرو : ربنا يستر ..... قالولي ربنا يستر

خايفين عليا لأن انا روحت بلغت عن ناس والله اعلم هيعملولي ايه

المذيعه : طيب ومامتك ؟

عمرو : بصراحه خايفه عليا اوي وبتدعي ربنا يسترها

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!


ولا تعليق اخر من عندي

غير حسبي الله ونعم الوكيل

وربنا يكرم عمرو عبد ربه لانه بجد مقبلش الاهانه ديه على كرامته
كمسلم اوولا وكأنسان ثانيا
وانا لسه مصدومه لحد دلوقتي ومش عارفه اقول اي تعليق

او اي رد فعل [ندعوك للتسجيل في المنتدى أو التعريف بنفسك لمعاينة هذه الصورة]

بس مستنيه تعليقاتكو