من طرف الحب الاول الأربعاء أبريل 02, 2008 9:53 amعزيزى المواطن بتاع النضال
ياراكب دماغك وغاوى الحلال
نصيحة يا صاحبى بلاش الخيال
وغمض عيونك وربى العيال
بلاش المقاوحة وكشف العيوب
وسيب المقاومة ونار الحروب
ليصبح ملفك صحيفة ذنوب
وتدخل برجلك طريق الزوال
بلاش المناكفة ولايم وعيش
هاتتعب معانا وسهمك يطيش
نلفق لاهلك قضية حشيش
وتصبح حكاية ونكتة ومثال
هاتصبح شيوعى هاتصبح امير
هاتصبح حرامى وندل واجير
ونقدر نلخبط فى اصلك كتير
وجدك شحاته هايصبح شاحال
هانحلف بان الحبايب شافوك
بتقبض ياخاين وتقتل اخوك
مراتك ساعتها هتلعن ابوك
وتلطم وتنعى احط الرجال
تعالى وهاودنا وعدى الامور
وعيش فى الطراوة وخش الطابور
لكن لو هاتزعل ودمك يفور
هاتشهد نهايتك فى بحر الرمال
تنخور ورانا هنزعل صحيح
وخليك فى حالك متبقاش ابيح
ولوكان لسانك مناكف فصيح
معاناالعساكر تهد الجبال
فخليك مؤدب وخليك لذيذ
فاحنا الحكومة وانتم المعيز
ورثنا التكية من الانجليز
فليه المناهده وليه السؤال
فلازم ياصاحبى تغمض عينيك
وطنش علينا نطنش عليك
واياك تشاورهانقطع ايديك
وتصبح مواطن مايسواش ريال
فحب الحكومة وحب السلام
وعلم ولادك يشدوا الحزام
علشان بعد بكرة ياكلوا الحمام
وينسوا الانيميا وينسوا الهزال
مالكش انت دعوة بايه اللى ضاع
ومين اللى خسر ومين اللى باع
ومين اللى تعب وايه اللى ضاع
ومين اللى كيل ومين اللى شال
عزيزى المواطن بتاع النضال
ياراكب دماغك وغاوى الحلال
نصيحة يا صاحبى بلاش الخيال
وغمض عيونك وربى العيال
