طيب اعمل ايه؟؟؟؟؟؟؟

حظك حلو يا ماكس مانص كان نفسي اقولك الحل من غير ماتعرفني بس انت الوقتي اكيد عرفت مين اللي قايلك على الحل الاخير المشكلة انك نسيت الاكاونت بتاعك مفتوح عندي وانا فتحت الموضوع من على الاكاونت بتاعك ورديت عليك في الموضوع بتاعك من غير ما اخد بالي ان الرد هيكون مكتوب باسمك وعلى العموم انا بعتذر ليكي ولكل المشتركين على الغلطة وياريت تركز في الرد بتاعي بدل ما تركز في مين اللي كتبه المشكلة اني ماكنتش عايزك تعرفني لاني عارف انك لو عرفت مين اللي قايلك على الحل مش هتعمله ولا تفكر فيه حتى وحبيت اكون شخص غريب بيكلمك وخلاص اسف كمان مرة
وانا هكتب الحل كمان مرة بس المرة دي من على الاكاونت بتاعي انا واسف كمان مرة


اول كلامي ابدا بالسلام

السلام عليكم ورحمة الله وبركاته

اولا اسمحلي اني اقولك رأيي

اذا كنت بتحب قريبتك دي فنصيحة مني ابعد عنها طبعا هتقولي ايه السبب

هقولك ان الصراحة انت متستاهلش انها تكون ليك

معلش اعذرني انا عارف ان صراحتي وحشة اوي بس يمكن تلاقي وسط شوية الكلام الوحش دا حاجة حلوة تعجبك وتريحك وتريح الناس اللي بتفكر في المشكلة اللي انت اصلا بتعقدها وعاملها مشكلة

نرجع لحتة انك ما تستاهلش ان قريبتك تكون ليك .... طبعا انا متأكد انك عايزها في الحلال يعني مش بس طموحاتك انها تقولك بحبك ودا باين من كلامك انك داخل بجد وان هي كمان متدينة ومش بتاعة تسالي

اللي اعرفه انا ان الحلال مفيش فيه كسوف وممكن تمشي بالاصول زي الناس العاقلين وتروح لاهل البنت اللي هم في نفس الوقت قرايبك وتتكلم معاهم بكل وضوح وصراحة وتشرحلهم الوضع عامل ازاي وامكانياتك ولازم توضح وتديلهم صورة انك راجل بجد وعايز بنتهم بالحلال على سنة الله ورسوله مش بس مجرد احساس وخلاص لا ... لازم تثبت انك اد كل كلمة بتقولها ... ومتخافش منهم محدش هيقدر يعملك حاجة بس انت كمان لازم تحط في بالك كل الاحتمالات اللي معرض ليها اي شاب في الدنيا لما بيتقدم لواحدة والاحتمالات دي انه ممكن يتقبل او يترفض سواء البنت دي قريبته او اول مرة يشوفها ويسمع عنها ودا طبيعي جدا مش هتكون اول ولا اخر واحد يحصل معاه كدا ولازم تكون راضي ان الامور دي كلها قسمة ونصيب يعني لو كانت من نصيبك تقول الحمد لله ولو كانت مش من نصيبك تقول الحمد لله اكيد ربنا مختارلك احسن من كدا وربنا عارف ايه الصالح لعباده

طيب بلاش الحل دا خالص لو مش عاجبك ونطول بالنا شوية على بعض لغاية ما نوصل لحل بإذن الله

الوقتي احنا متفقين انك خجول شوية ومش هتقدر تتكلم في حاجات زي دي .... هنضطر نلجأ لأساليب انا مش بحبها الصراحة وهي الاساليب بتاعة الجنس الناعم

شوف يا سيدي ممكن توسط واحدة توصل لبنت خالتك الكلام دا وتشرحلها نيتك في الارتباط والجواز وتخليها تشوف رد فعلها اذا كان فيه قبول او رفض وانت ونصيبك بقى

يا اخي الحياة المغامرة والواحد ما بيصدق تجيله فرصة بيمسك فيها بايديه واسنانه وسبحان الله انت بتقول كلام ورد فعلك مش جاي مع الكلام خالص يعني بتقول انك هتموت عليها وفي نفس الوقتي واقف مكانك مش عايز تعمل أي حاجة وفكرتني بواحد صاحبي كان بيحب واحدة وهيتجنن عليها بس فوجئت بيه بعد ما كنت بتحايل عليه انه يفاتحها في الموضوع ويحاول يرتبط بيها بس كان رده عليا انه قالي انا مقدرش اعمل اكتر من النظرات وهي المفروض تفهم وتيجي هي تكلمني انما انا عمري ما هروح اكلمها الكلام دا كان في سنة 2001 واحنا الوقتي يديلك طولة العمر في 2008 ومع ذلك يا اخي هو لسه مستني بس مش عارف هو الوقتي مستني ايه بالظبط ؟؟؟؟؟

صدقني والله والله والله لو انت فاتحت اهلك في الموضوع واخدت موافقتهم وكلمت اهل البنت بنفسك من غير ما تدخل وسيط بينكم هتعلى اوي في نظرهم وهيتاكدوا انك راجل بجد وانك هتحب بنتهم وتخاف عليها وتديلها اكتر من أي حد تاني حب وحنان وامان

والله يا اخي انا كان نفسي احل المشكلة بتاعتك دي فعلا بس المشكلة مش في قلة الحلول

المشكلة انك انت مش عايز تحل ولا تربط مع ان الحكاية بسيطة بس انت مكبرها شوية

اتوكل على الله وريح نفسك من العذاب دا كله واقولك على حاجة احسن من دا كله صلي صلاة الاستخارة وشوف ربنا هيؤمرك بإيه وان شاء الله ربنا مش هيخيب ظنك

يارب اكون قدرت اساعد وان شاء الله جاري التفكير في حلول اكتر والله المستعان