من طرف بتابع انهاردا مؤتمر الحزب الوطنى
واللى غيظنى اوى ان الحكومه بالكامل موجوده مفيش حد مش موجود اظاهر عندهم
هم كمان حضور وانصراف واللى مش هيجى هيتاخد غياب..ومش مهم مصالح الناس ,,
الاهم الحزب ,,,
وكله كوم وعضو مجلس الشورى كوم تانى اللى قال لجمال مبارك بالحرف:
رأيت فيك قوة ناصر وطموح السادات وحكمة مبارك....
خلاص كده بأت رسمى ياجماعه رئيس مصر الرابع هيضم صفات كل من سبقوه....وخلاص كده عرفنا مين هو الريس ياولاد...
اه يادوله ملكيه اكتر من الملك نفسه...ولكى الله يامصر
انهردا كانت كلمة السيد جمال مبارك,,,بصراحه ياسيد جمال والله شكلك ريس
بجد واقف كده اسد بيتكلم لا وكمان بتخبط على المكتب اللى ادامك من
العصبيه...وقلت:
سوبوكو (هى المفروض سيبوكوا بس هو قلها كده) من الشعارات و الايديولوجيات
ما تقوليش رأسمالي واشتراكي قول لي اوفر فرص عمل ازاي؟ احنا اوجدنا فرص
عمل....
متصقف يابنى انت وهو وهى الحزب وفرلنا وظايف ومحدش هيفوته القطر وخريج
هندسه هيشتغل عامل ....انتو شعب طماع والله احمدوا ربنا مش كفايه العالم
كله بيعانى من ازمه اقتصاديه واحنا بفضل الحزب الوطنى متأثرناش بأى
حاجه(دا كان تصريح لجمال مبارك)....
وفى جلسه تانيه شوفت السيد جمال مبارك ومعاه وزير الصناعه ووزير الاستثمار
ووزير الماليه والسيد جمال مبارك بيسألهم اسئله وقال لوزير الاستثمار
بالحرف :
اجابتك لا تتعدى اربع دقايق لو سمحت (تقولش امتحان الثانويه العامه)
واسمع بأه الاجابات وانت تعرف اد ايه احنا شعب رخم واننا مش بنقدر الناس
دى.وازاى هم بيتعبوا علشانا.وفجأه لقيت سعاد حسنى بتقول فى
ودنى(بمبى,,بمبى الحياه بأه لونها بمبى وانا جمبك والحزب الوطنى
جمبى)..سمعت انجازات وفرص عمل واستثمارات ومليارات داخله للبلد ...وعلى
رأى هانى رمزى انا عاوز حقى فى المليارات دى ياريس!!!!!!!!!!!!!
وبعد دا كله محرمتش لقيت كلمة د.نظيف وانتو عارفين اد ايه انا بحب اسمع كلامه بضحك مووووووووووت ...
واول حاجه قالها عايرنا بالـ30% زياده فى المرتبات (تقولش اصلا الشعب
اتهنى بيها) وازاى هم دخلو مواليد جديده على بطايق التموين ولا كلامه عن
الدعم وفجأه الناس صقفت.!!!!!!!!!!!!! وقعد يقول ويتغنى فى الانجازات
(ياجماعه حد يسكته)
واسمعوا الحته الجامده دى اوى اوى قالك:
(مصر قادره على امتصاص الازمات)
لما
رمضان جيه وجاى معاه دخول المدارس كله قال ازاى كده مينفعش واهو رمضان جيه
وكل سنه وانتو طيبين والمدارس كمان والبلد ماشيه عادى...
وفجأه تصفيق مدوى فى القاعه..!!!!!!!!!!!! بس عجبتنى اوى (مصر قادره على امتصاص الازمات) جمله عبقريه والله...
وقال جمله تانيه عجبتنى جداااااااااا (اوعوا تتخيلوا ان المستثمر الاجنبى
هو اللى بيأثر فينا احنا اللى بنأثر فيه) مش عارف ليه افتكرت
اللمبى....بس ناقصه ابسلوتلى ..
وكله كوم ولما قال مصر قويه بالحزب الوطنى وجيشها وبرئيسها وبرجال اعمالها وتصفيق حاده فى القاعه....(مش بقولكوا حد يسكته)
ياجماعه ارجوكو من فضلكو احنا معترضناش وساكتين بس بلاش كلام مستفز,,حسوا بالناس شويه.....
وحسبى الله ونعم الوكيل ودا اللى قدرت اتابعه لانى حسيت انى ممكن يجيلى شوجر او هارت اتاك وانا لسه صغنن...
ومش عارف ليه افتكرت الصندوق الاسود للعباره وواحد بيقول للقبطان
(المركب بتغرق ياقبطان)..!!!!!!!! فعلا المركب بتغرق ياقبطان.
ونام يامصرى مصر بتقولك تبصح على خييييييييييييييير...وعلى رأى زوزو نبيل (نام وشد اللحاف نااااااااااااااااااااااااام)
